| |
03-06-2008, 09:00 AM
| رقم المشاركة : 1 (permalink) | ||
|
|  عشان إنت مصري  عشان انت مصرى... لازم تعانى وتفقد كرامتك بكل المعانى وتحرق فى دمك سنين مش ثوانى واوعى تصدق كلام الأغانى بتاع الحضارة وكانى ومانى ده كله هجايص مايدخل ودانى عشان انت مصرى العذاب بيناديك بتبدأ فى يومك حاجات بترازيك فى نومك فى قومك تعكنن عليك تضايقك ولسه العماص فى عينيك مافيش مية تشطف صابونة فى إيديك وجسمك ملزق وريحتك عاديك فتلبس وتنزل وفيك اللى فيك ورايح لشغلك حتحتاج مواصلة أدى المترو واقف وكهربته فاصلة وفى الميكروباص خناقة وحاصلة أوتوبيس فرامله عايزالها وصلة وتوك توك ده تايه ومحتاج لبوصلة بتوصل لشغلك بدم اتحرق فى زحمة وكتمة وحر وعرق رئيسك سايبلك كومة ورق ده غير دمغة ضايعة وملف اتسرق وفيه كام مواطن عامللك قلق بيشكى تقول له روح اندعق وعركة وهوجة وشاى اندلق ومخك خلاص م الصداع اتفلق هترجع لبيتك ده لو كان فى بيت هتوصل هتندم ياريتك ماجيت مراتك بتصرخ خلاص استويت عيالك بتطلب وهات كيت وكيت تزعق تِهاتى ياناس اتهريت ولا حد سامعك مهما هاتيت عشان انت مصرى وده للاسف فلازم تقاسى تعيش تتقرف وكل الأساسى فى حياتك ترف فتنسى الكرامة وتنسى الشرف وتسرق وتنصب أو تنحرَف ودمعك بيجرى وجرحك نزف مش انت اللى مصرى؟؟؟ جتك ميت قرف
| ||
|
|  |
 |
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| طرق مشاهدة الموضوع | |
|
|
| روابط مفيدة : استرجاع كلمة المرور | طلب كود تفعيل العضوية | تفعيل العضوية |
العرض العادي
