مصراوية

لو لم أكن مصريا لو وددت أن أكون أي حاجة تانية



الله يرحمك يا عم مصطفى كامل باشا .. لو كنت تعيش معنا هذا الزمان الأسود لما كنت زعقت بعلو صوتك وقلت كلمتك الشهيرة ..

لو لم أكن مصريا لوددت أن أكون مصريا

ما الذى يدفع أي إنسان أن يعتز بإنتمائه لبلده؟؟ ما الذى يجعل واحد مثل حليم يشدوا بكل فخر ...

أحلف بسماها و بترابها..أحلف بالقمح وبالمصنع..أحلف بالمدنا و...الخ

هذا الإعتزاز و ذلك الفخر لابد أن يكون له سبب ..وسببه في اعتقادي هو الحب..أكيد الناس دي كانت بتحب مصر..بتموت فيها..بتعشق سماها وهواها وترابها وناسها..والذي منه !!

لكن ليه ؟؟ ليه الناس دى كانت بتحب مصر؟؟ ليه الست كانت بتقول:

مصر التى فى خاطرى و فى دمى .. أحبها من كل روحى و دمى

مفيش حب كده من الباب للطاق ..متقوليش عشان اتولدت مصري يبقى لازم تحب مصر وتموت فى دباديبها..متقوليش حب من أول نظرة..لأن أكيد تاني و تالت نظرة حتخليك تغير رأيك..متقوليش حب من طرف واحد .. يعنى الطرف التانى يديك بالجزمة القديمة وانت بتصرخ .. بحبك بحبك !!

فى رأيي أن الحب علاقة متبادلة بين طرفين..مشاعر ماشية فى اتجاهين..يعنى لازم البلد تحبك عشان تحبها ..وبسلامتها البلد دى تحبك ازاى ؟؟؟ ..أقولك!!

تحبك يعنى ترعاك .. تهتم بيك .. بالبلدى كده تعبرك .. تحسسك إنك بني آدم لك قيمة وليك رأى..تعترف أن ليك حقوق زى ما عليك واجبات.

من حقك : تأكل لقمة نضيفة من غير مبيدات ولا مسرطنات ولا تقاوي فاسدة ..من حقك تاكل رغيف عيش من غير مسامير ولا صراصير ولا بلا أزرق..



من حقك : تتنفس هوا نضيف من غير هباب ولا أطران ولا دخان مصانع وكبريت ورصاص وسخام أسود منيل بستين نيله..



من حقك : تلاقى مواصلة تركبها من غير بهدلة و شحططه ومرمطة وتزنيق و تلزيق وبلطجة وقلة أدب واللي مش عاجبه الباب يفوت جحش..



من حقك : تلاقى شغلة شريفة من غير ذل ومهانة وفوت علينا بكرة يا سيد .. من غير كوسة ومحسوبية وأبجني تجدنى وسكة أبو زيد كلها مسالك..



من حقك : لو عييت تلاقى حتة تتعالج فيها بكرامتك وتتعامل كإنسان محترم مش كأنك متسول جاي تشحت من الدكتور اللي أصلاً قرفان من نفسه ونفسه يديلك حقنة هوا عشان يخلص من أمثالك ..



من حقك : تلاقى حد يجيبلك حقك لما يتنطط عليك حتة عيل شبه البرص مش باين من الأرض ويقولك..أنت مش عارف أنا ابن مين يا ابن ال .... ويبقى نهارك أسود لو طلع أبوه ظابط و لا وزير و لا......... واللي له ضهر مينضربش على بطنه..



من حقك : لو دخلت قسم الشرطة تخش بثبات بدون رعب من غير ما تبص حواليك خوفا من قفا طاير أو شلوت ضل الطريق أوروسية تبحث عن ضحية أو شتيمة عابرة للقارات ده غير السحل و النفخ وهتك العرض و السفالة وقلة الأدب و المواطن مجرم وابن ستين ... حتى تثبت براءة اللي جابوه ... ويا ويلك يا سواد ليلك لو كانت دقنك منبته انشالله تقاوى شعر .. يبقى انت ارهابي .. واشحن على أمن الدولة لحد ما يبانلك صاحب.. وإن بانلك صاحب يبقى نهار أبوه أسود هو كمان



من حقك : تتفرج على تليفزيون بلدك تحس بالفخر..تشوف مدارس بتتبنى ومصانع بتشتغل و كباري بتتفتح و مستشفيات بتتجدد و مدن بتتعمر وشباب زى الورد بيشتغل و يبني ويعمر ويضحي بعرقه ودمه.مش تشوف بلد بتتسرق..وقضاة بتنضرب..وصحفيين بتتسحل..وأسعار كل يوم بتولع..والحرامية اللي سرقوا البلد إما في أوروبا أو في مارينا..وحكومة مش فاهمة حاجة فى أي حاجة ورئيسها بيقول الشعب لازم يرضع الديمقراطية بالبزازة..ومجلس شعب دايماً موافق وهو نايم بيشخر..وأكبر راس فى البلد مرعوب وخايف يحط إيده فى بق الأسد..مستني لما الأسد يهبش ....... مش إيده..والكتكوت الصغنون متصدر فى الفاضية و المليانة ونافخ ريشه عشان يورينا إنه دكر و بيعرف يكاكي زى بابا

احنا فعلا في حرب و ده ميختلفش عن اللي بيحصل في فلسطين غير فى حاجة واحدة بــس .......... ان اسرائيل بتعمل هجمات علنية و الحكومة بتعمل هجمتها فى الخفااااااااااااء ................
و زي ما اسرائيل بتدخل بيوت الفلسطينيين و ياخدوا رجالهم .... الحكومة المصرية كمان بتعمل كدة ...... تدخل على اي بيت فيه راجل سمعت انه مناضل على طول تخده من آفاه و عالمعتقل عـــدل



يا ترى بعد كل ده لسة مش فاهمين ليه الشباب بيسيب البلد و يهج؟؟ !! يا ترى لسة مش فاهمين ليه طلبة المنصورة ما صدقوا حطوا رجلهم فى أمريكا ومحدش شافهم تانى ؟؟..لسة بتسألوا فين أحمد زويل و فاروق الباز و مجدى يعقوب..وغيرهم كتير و كتير؟؟...... يا ترى كل دول خونة و مجرمين و معندهمش و لاء وانتماء؟؟!!



ياترى يا عم مصطفى كامل باشا لو كنت عايش معانا .. كنت حتقول إيه ؟؟؟؟

هقول منتظرين حضنك ياأمي
يامصر ترجعي لنا ونرجعك
ياأمي يامصر وصابرين حتى لو هنموت ولو نفش ريشه الكتوت برضه مش هنقول غير اننا مصريين ومش هتنازل عن حقنا للمجرمين ابدا ولا هنكون يوم بمزجنا نايمين ولكن بحق فداك دمي بحبك ياأمي يامصر ياقلبي يادمي

ياترى يا عم مصطفى كامل باشا لو كنت عايش معانا .. كنت حتقول إيه ؟؟؟؟

لوكان عايش لما قال غير هااااااااااااا ولكن نسأل الله العلي القدير ان يغير العصابات التي تتحكم في كل شئ ويرزقنااااااااااااا بطانه صالحه وبايد اولادك يامصر هتعودي دوله كبري ناضجه بين كل البلاد ام الدنيااااااااااا وشعبك احلا بشر تقبلي مروري