فى مصر فقط

*في مصر فقط لم يذكر السجن في القران الكريم إلا في مصر (في سورة يوسف )

* في مصر فقط .. الأموات ينفقون علي الأحياء "الفراعنة والأهرامات والذي منه"

* في مصر فقط .. تجد شخصا أقل منك في المستوي العلمي وحصل علي 50% فقط في الثانوية العامة .. ولكنه يتنطط عليك أو بالبلدي يركب ويدلل رجليه لأنه ببساطة دخل بيهم شرطة .. اللي في خدمة الشعب.

* في مصر فقط .. ينمو نبات البردي وورد النيل والجرجير والخبيزة والليف - حتة ثقافة -

* في مصر فقط .. توجد السلعوة وهي "مسخ" ناتج عن تزاوج الكلاب الضالة في جو العاصمة الملوث - حتة جيولوجيا -

* في مصر فقط .. تأكل الحواوشي والشكشوكة والكشك الأسيوطي والملوخية بالأرانب والمسقعة والكشري ومحشي الكرنب وطاجن العكاوي والكبدة الاسكندراني .. آه نسيت .. والفووووووووووووووووول اللي مش سوداني.

* في مصر فقط .. تعبر الكلاب الشوارع بطريقة أشبه بالتي يعبر بها الآدميون .. تقف الكلاب علي جانب الطريق تنظر يمينا ويسارا حتى تعبر في أمان .. وليت البشر عندنا يعبرون بالطريقة نفسها ينجون مثل الكلاب .. ولكن المواطن المصري والمصري فقط يجب أن يعبر الشارع كطائر البطريق أو البط البلدي.

* في مصر فقط .. يمتلك المواطن بالوقت والممارسة مهارات خاصة في ركوب الأتوبيسات المسرعة والتسلل إلي العمق أو الوقوف بأطراف أصابع القدم علي أخر درجة في السلم "اطلع من علي الباب يا فندي العربية فاضية أدام" .. طبعا ربنا ما يوريك بقى لو كانت مليانه.

* في مصر فقط .. تنشب الصداقة سريعا وفي اقل من ثوان في إشارة المرور أو في مصلحة حكومية أو في الأسانسير أو حتى في طابور العيش.

* في مصر فقط .. تجد منطقة سكنية بكاملها (سارقة كهربا ) مثل عزبة الهجانة - حتة تعداد سكاني -

* في مصر فقط .. ملك فرعوني بني لنفسه تمثالا ضخما لا تشرق الشمس علي وجهه إلا مرتين في السنة مرة يوم عيد تتويجه ملكا ومرة يوم عيد ميلاده هو شخصيا .. "صبح .. صبح .. يا عم الحاج"

* في مصر فقط .. وزير ( يسرطن ) الشعب ثم يرشحه الحزب الحاكم في انتخابات مجلس الشعب .. بس مش أي شعب .. ده شعب على أبوه.

* في مصر فقط .. يتم إنفاق ملايين الجنيهات من أجل الحصول علي "صفر كبير" أمام العالم .. كانوا خايفين ياخدوا درجة بالسالب .. بجد الصفر أرحم.

* في مصر فقط .. يقدم الكشري ساخنا في أكياس بلاستيكية شفافة.

* في مصر فقط .. ادفع وبعدين اشتكي - التحصيل أولا -

* في مصر فقط .. الاختيارات السياسية المتاحة أمام المواطن هي التصويت بـ "نعم " او "لا"

* في مصر فقط .. تم القضاء نهائيا علي ظاهرة "إدمان الهيروين" بعد أن أصبح "البانجو" في متناول الجميع .. ولم يعد لكوكو الضعيف (السجائر الغير محشية) الشعبية السابقة بين الناس.

* في مصر فقط .. رئيس حزب لازال مرتديا الطربوش حتى الآن.

* في مصر فقط .. لا يتم وضع الملصقات إلا تحت لافتة "ممنوع لصق الإعلانات"

* في مصر فقط .. لا يمتلك المواطنون زيا رسميا موحدا ويصعب أن تعرف المصري من مجرد ملابسه ( إلا لو كان لابس تي شيرت مكتوب عليه بالأخضر "فكر جديد")

* في مصر فقط .. يوجد نوع من المسكنات علي هيئة مصطلحات يتم تقديمها للشعب بجرعات مكثفة مثل ( الشفافية) ,( التمثيل المشرف) , ( إشادة البنك الدولي بمصر),( أهمية الدور الذي يلعبه شباب النيل .. جيل المستقبل).

*في مصر فقط ممكن يتصرف مليار جنية علي مشروع وقبل ما يتم افتتاحة يطلع واحد ويقول دا لا يصلح وبعدين يهدوة فورا
*في مصر فقط ممكن نبيع رخصة للمحمول ب 16 مليار جنية ويدخلوا موزنة الدولة وكل القيادات تقر باسهامهم في البنية التحتية وتحسين التعليم وتحسين السكة الحديد وووووو وبعدين متلقيش ولا مليم دخل كلهم يدخولو باب اول وهي المكافاءت
*في مصر فقط كان ممكن يتعمل جسر بري يربطنا بالمملكة العربية السعودية وكان يحصل طفرة في العلاقات الاقتصادية و تسهيل الحج والعمرة ووو وفجاءة يطلع واحد يقول دا خطر علي شرم الشيخ
*في مصر فقط ممكن الجهاز المركزي للمحاسبات يقر بتقصير الحكومة وتجاوزتها وتفشي الفساد وزيادة الاسراف الحكومي وكمان اعضاء من مجلس الشعب يطلوبوا بسحب الثقة وبعدين في ختام الفصل التشريعي يهنئوا الحكومة بادائها الرائع
*في مصر فقط ممكن نبيع اراضي من مصر للاجانب وللعرب علشان ندعم الباب الاول للحكومة
*في مصر فقط ممكن نبيع عمر افندي وبنك القاهرة وبنك الاسكندرية بتمن الثمن علشان تدعيم حديد الدخيلة
*في مصر فقط كل وكلاء وزارات التضامن الاجتماعي عندهم افران خاصة علشان الدقيق المدعم ميطلعش بره
كل دا وفي كتير جدا بس برضة بنحبها جدا ومستنين الصبر علي جارك السو يا يرحل يا يجيلة مصيبة تخدة

أخيرا فإن ما يوجد في مصر فقط وحصريا على أرض الواقع أكثر بكثير مما نستطيع حصره في مجرد سطور .. ولكننا نقولها وبكل شاعرية ودراماتيكية وحنية:"عظيمة يا مصر يا أرض النعم"

منقول